നമ്മുടെ സഹോദരിമാർ ചതിക്കപ്പെടാതിരിക്കാൻ....

• എഴുതിയിരിക്കുന്നതു മലപ്പുറത്തുകാരന്‍ ~Basheer~ - ജനുവരി 29, 2014 - 1:04am in പൊതു കാര്യങ്ങള്‍
• സന്ദേശം അയക്കാം   ചര്‍ച്ചകള്‍ കാണാം

എനിക്കറിയാവുന്ന ഒരു യുവതി, അവളുടെ ചിത്രം ഫേസ്ബുക്കില്‍ പ്രൊഫൈല്‍ ചിത്രമായി പോസ്റ്റ് ചെയ്തപ്പോള്‍ അത് പിന്‍വലിക്കാന്‍ ഞാന്‍ ആവശ്യപ്പെട്ടു. മുഖത്തിന്റെ ചിത്രം മാത്രമല്ലെയുള്ളൂ അതു കൊണ്ടൊന്നും കുഴപ്പമില്ല; എല്ലാവരും അത് ചെയ്യുന്നതല്ലെ എന്നൊക്കെ ന്യായീകരിച്ച് അത് പിന്‍വലിക്കാന്‍ കൂട്ടാക്കിയില്ല. എന്റെ സിസ്റ്റത്തിലുണ്ടായിരുന്ന ഒരു സാധാ എഡിറ്റിങ്ങ് സോഫ്റ്റ്വെയര്‍ ഉപയോഗിച്ച് അവരുടെ മുഖം മറ്റൊരു ശരീരത്തില്‍ 'ഫിറ്റ്' ചെയ്ത് പുതിയ ഒരാളെ 'നിര്‍മിച്ച്' മെയില്‍ ചെയ്ത് കൊടുക്കേണ്ട താമസം ആ ചിത്രം അവര്‍ പിന്‍വലിച്ചു.
മുമ്പ് നടന്ന ഈ സംഭവം ഇപ്പോള്‍ ഓര്‍ക്കാന്‍ കാരണം, “ഫേസ്ബുക്ക് അധിക്ഷേപം: യുവതി ആത്മഹത്യ ചെയ്തു” എന്ന വാര്‍ത്ത വായിച്ചപ്പോഴാണ്.
ഇത്തരം ആത്മഹത്യകള്‍ ഒറ്റപ്പെട്ടതാണ് എന്ന് പറഞ്ഞ് പ്രശ്നത്തെ നിസ്സാരവല്ക്കരിക്കുന്നവരുണ്ട്. ആത്മഹത്യകള്‍ ഒറ്റപ്പെട്ടതാവാം, പക്ഷെ പെണ്കുട്ടികള്‍ അപമാനിതരാവുന്ന അനേകം സംഭവങ്ങള്‍ ദിനേന നടക്കുന്നുണ്ട്. പക്ഷെ ഒന്നും പുറത്തറിയാറില്ലെന്ന് മാത്രം.
പലപ്പോഴും നമ്മുടെ സഹോദരിമാര്‍ അപമാനിക്കപ്പെടുകയും അവരുടെ ചിത്രങ്ങള്‍ ദുരുപയോഗപ്പെടുത്തപ്പെടുകയും ചെയ്യുന്നത് ഒരിക്കല്‍ പോലും ശ്രദ്ധയില്‍ പെട്ടില്ലെന്ന് വരാം എന്നതാണ്‍ ഇതിലെ ഏറ്റവും അപകടം പിടിച്ചതും പലരും മനസ്സിലാക്കാത്തതുമായ ഒരു കാര്യം
തന്റെ സൌന്ദര്യത്തിന് എത്ര ലൈക് കിട്ടുമെന്നറിയാനായി യുവതികളും തനിക്ക് കിട്ടിയത് സുന്ദരിയായ ഭാര്യയേയാണെന്ന് കൂട്ടുകാരോട് പറയാതെ പറയാന്‍ വേണ്ടി യുവാക്കളും ഇങ്ങിനെയൊന്നും ചിന്തിക്കാതെ നിഷ്കളങ്കമായി തങ്ങളുടെ കുടുംബ ചിത്രങ്ങള്‍ പോസ്റ്റ് ചെയ്യുന്നവരും ഇതിന്റെ പിന്നിലുള്ള അപകടങ്ങളെ കുറിച്ച് ബോധവാന്‍മാരല്ല. കൂടിപോയാല്‍ ആരെങ്കിലും മോശമായ കമന്റുകള്‍ എഴുതുകയോ സമ്മതമില്ലാതെ ഫോട്ടൊകള്‍ ഷെയര്‍ ചെയ്യുകയോ ചെയ്തേക്കാം, അങ്ങിനെ വന്നാല്‍ തന്നെ ഫേസ്ബുക്കില്‍ റിപ്പോര്‍ട്ട് ചെയ്യാനും സൈബര്‍ സെല്ലില്‍ പരാതി പറയാനും വകുപ്പുണ്ടല്ലോ എന്ന് സമാധാനിക്കുകയും ചെയ്യുന്നു.
ഇന്റെര്‍നെറ്റിലൂടെ നടക്കുന്ന ഒരു വന്‍വ്യവസായമാണ് സെക്സ് എന്നത്. ലക്ഷക്കണക്കിന് വെബ്സൈറ്റുകളാണ് ഈ രംഗത്തുള്ളത്. കോടിക്കണക്കിനുള്ള അവരുടെ കസ്റ്റമേഴ്സിനു ദിനേന നല്‍കാന്‍ പുതിയ പുതിയ സ്റ്റഫ്ഫുകള്‍ അവര്‍ക്ക് കണ്ട്ത്തേണ്ടതുണ്ട്. അതിന് വേണ്ടി അവരെ സഹായിക്കാനായി ഒരു വന്‍ സെക്സ്മാഫിയ തന്നെ ഈ രംഗത്ത് പ്രവര്‍ത്തിക്കുന്നുണ്ട്. ഒളിക്യാമറകളിലൂടെ പകര്‍ത്തുന്ന വീഡിയോകളും മോര്‍ഫിങ്ങും എഡിറ്റും ചെയ്യുന്ന ചിത്രങ്ങളുമാണ് ഈ ഏജന്‍സികള്‍ അവര്‍ക്ക് നല്‍കുന്നത്.
ഇവിടെയാണു ഒരു മുഖത്തിന്റെ വില. അവരുടെ വശമുള്ള എതെങ്കിലും നഗന്മായ ഒരു ശരീരത്തിന്റെ ചിത്രത്തോട് ഈ മുഖവും ചേര്‍ത്ത് പുതിയ ഒരു ചിത്രമുണ്ടാക്കുന്നു. ഒരു നഗ്നശരീരത്തിന്റെ ചിത്രം കൊണ്ട് തന്നെ അവര്‍ക്ക് ഇങ്ങിനെ അനേകം ചിത്രങ്ങള്‍ ഉണ്ടാക്കാന്‍ കഴിയും. പ്രൊഫഷണല്‍ എഡിറ്റിങ്ങ് / മോര്‍ഫിങ്ങ് സോഫ്റ്റ് വെയറുകള്‍ ഉപയോഗിച്ച് വിദഗ്ദര്‍ നിര്‍മിക്കുന്ന ഇത്തരം ചിത്രങ്ങള്‍ കൃതിമമായി നിര്‍മിച്ചതാണെന്ന് അറിയാനും കഴിയില്ല!
നമ്മുടെ ഭാര്യമാരുടെയും മക്കളുടെയും സഹോദരികളുടെയും മുഖങ്ങള്‍ എതോ നഗ്നശരീരവുമായി ചേര്‍ന്ന് ഇന്റെര്നെറ്റിലൂടെ വ്യാപാരം നടക്കുന്ന ഒരു രംഗം വെറുതെ സങ്കല്‍പിച്ച് നോക്കൂ! അത്തരം ഫീല്‍ഡുമായി ബന്ധമില്ലാത്തതിനാല്‍ തന്നെ നാം ഒരിക്കലും അതറിയാന്‍ പോകുന്നില്ല.
അതിനാല്‍ ഒരു കാരണവശാലും സ്ത്രീകളുടെ ഫോട്ടോകള്‍ സോഷ്യല്‍ നെറ്റ് വർ
ക്കുകളിൽ പോസ്റ്റ് ചെയ്യാതിരിക്കുക.
ഇത്രയും എന്റെ നിരീക്ഷണങ്ങളാണ്  എഴുതിയത്... ഇനി നിങ്ങളുടെ വിലപ്പെട്ട അഭിപ്രായങ്ങൾ പ്രതീക്ഷിക്കുന്നു.



http://w.suhrthu.com/forum/topic/show?id=2669796%3ATopic%3A5583600&xgs=1&xg_source=msg_share_topic

പെണ്ണിനെന്താ രാത്രി ഓണ്‍ലൈനില്‍ കാര്യം രൂപ കരുമാരപ്പറ്റ

പെണ്ണിനെന്താ രാത്രി ഓണ്‍ലൈനില്‍ കാര്യം 
രൂപ കരുമാരപ്പറ്റ 

'പോയി കെടന്നൊറങ്ങ് പെണ്ണേ' കിലുക്കത്തില്‍ രേവതിയോട് ജഗതി പറയുന്ന ഡയലോഗ് ആണ്. രാത്രി ഓണ്‍ലൈന്‍ വരുന്ന പെണ്‍കിടാങ്ങള്‍ ഒരിക്കലെങ്കിലും ഈ വാക്കുകള്‍ കേള്‍ക്കേണ്ടി വന്നിരിക്കും. പ്രത്യക്ഷത്തില്‍ ചെറിയ സംഭവമെങ്കിലും വേലിക്കെട്ടുകളില്ലാത്ത ഇന്റര്‍നെറ്റില്‍ പോലും ഇരുട്ടിയാല്‍ സ്ത്രീകള്‍ വരരുതെന്നു കരുതുന്ന മലയാളികള്‍ നമുക്കിടയിലുണ്ടെന്നതാണ് യാഥാര്‍ഥ്യം. 

രാത്രിയായാല്‍ വീട്ടുകാര്‍ക്ക് ഭക്ഷണം വിളമ്പി, കുറച്ച് സീരിയലും കണ്ട്, നേരത്തെ കിടന്നുറങ്ങുന്ന മങ്കമാരെന്ന സങ്കല്‍പ്പത്തില്‍ നിന്ന് മുന്നോട്ടു പോകാന്‍ വലിയൊരു ശതമാനം മലയാളികളും ഇഷ്ടപ്പെടുന്നില്ല. 21ാം നൂറ്റാണ്ടിലും ഇങ്ങനെ കുറെ മനുഷ്യര്‍ ഇവിടെ ജീവിക്കുന്നുവെന്നത് മറുനാട്ടുകാര്‍ക്ക് അത്ഭുതമുളവാക്കിയേക്കാം. 
സ്ത്രീകള്‍ രാത്രി ബ്രൗസ് ചെയ്യുന്നതില്‍ നീരസമുണ്ടെന്നത് സങ്കല്‍പ്പിച്ചെടുത്ത ധാരണയാണോയെന്നൊരു സംശയം സ്വാഭാവികം. ഇതു തെളിയിക്കാനായി അര്‍ദ്ധരാത്രി മലയാളത്തിലെ പ്രമുഖ ഫേസ്ബുക്ക് ഗ്രൂപ്പുകളില്‍ ഈ ചോദ്യം പോസ്റ്റ് ചെയ്തു. ഉത്തരങ്ങള്‍ പലതും ഞെട്ടിക്കുന്നതും വിഡ്്ഢിത്തങ്ങളുമാണ്. അവയില്‍ ചിലത്: 

'രാത്രി ഓണ്‍ലൈന്‍ വരുന്ന പെണ്ണുങ്ങള്‍ പോക്കു കേസുകളായിരിക്കും'
'ബെഡ് റൂമില്‍ അവര്‍ തനിച്ചായതു കൊണ്ടാണ് ആ നേരത്തു ബ്രൗസ് ചെയ്യുന്നത് '
'സ്ത്രീകള്‍ ഉറക്കമൊഴിഞ്ഞാല്‍ അസുഖം വരും. അവര്‍ക്ക് ആണ്ണുങ്ങളെപ്പോലെ എപ്പോഴും ഊര്‍ജ്ജസ്വലരായിരിക്കാന്‍ കഴിയില്ല' 
'അവളെ പറഞ്ഞിട്ടു കാര്യമില്ല, വീട്ടുകാര്‍ നിയന്ത്രിക്കാത്തതു കൊണ്ടാണ്.'
'നല്ല കാര്യത്തിനൊന്നുമാകില്ല ആ നേരത്തെ ബ്രൗസിങ്ങ്'
'തറവാട്ടില്‍ പിറന്ന പെണ്ണുങ്ങളൊന്നും രാത്രി ഓണ്‍ലൈന്‍ ഉണ്ടാവില്ല' 

ഇങ്ങനെ നീളുന്ന അഭിപ്രായപ്രകടനങ്ങളില്‍ ഭൂരിപക്ഷവും സംസാരിച്ചത് പുരുഷന്‍മാരാണ്. സ്ത്രീകളെ പിന്തുണയ്ക്കാനും ചിലര്‍ മറന്നില്ല. ആണുങ്ങള്‍ക്ക് ബ്രൗസ് ചെയ്യാമെങ്കില്‍ പെണ്ണിനും ഏതു നേരത്തും ഓണ്‍ലൈന്‍ വരാമെന്ന് ഇക്കൂട്ടര്‍ പറയുന്നു. കാമകണ്ണുകളോടെ വല വിരിച്ചിരിക്കുന്നവരെ സൂക്ഷിക്കണമെന്നു സ്‌നേഹപൂര്‍വമുള്ള ഉപദേശങ്ങളും കിട്ടി. 
പല കൂട്ടായ്മകളിലും 'നൈറ്റ് ടോക്ക്' എന്നൊരു വിഭാഗം കാണാം. സ്ത്രീകള്‍ അതില്‍ നോക്കരുതെന്നു മുന്നറിയിപ്പും കാണാം. ഓണ്‍ലൈനിലെ രാത്രി സംസാരത്തിന് അശ്‌ളീലതയെന്നൊരു അര്‍ത്ഥം മാത്രമേയുളളൂവെന്നു പലപ്പോഴും തോന്നാറുണ്ട്.
ഫേസ്ബുക്കില്‍ നിന്നു ലോഗൗട്ട് ചെയ്ത് ട്വിറ്ററിലെത്തിയാലും സ്ഥിതി വിഭിന്നമല്ല. ഇരുട്ടാകുമ്പോള്‍ മലയാളിയിലെ സദാചാരത്തിന്റെ കപടമുഖം വലിച്ചെറിയപ്പെടുന്നു. ട്വീറ്റുകളില്‍ പലതും അറപ്പുളവാക്കും. ഈ നേരത്തു വരുന്ന പെണ്ണുങ്ങള്‍ ഫേക്കുകളോ സെക്‌സ് ചാറ്റിനായി വരുന്നവരോ ആയാണ് 'ട്വീപ്പു'കള്‍ കരുതാറുള്ളത്. 
സ്ത്രീകള്‍ക്ക് രാത്രി സഞ്ചാരസ്വാതന്ത്രമില്ല, ലൈംഗികാതിക്രമങ്ങള്‍ കൂടുന്നുവെന്നിങ്ങനെ ഗൗരവമേറിയ പല വിഷയങ്ങളുമുണ്ടെന്നിരിക്കെ പാതിരാവില്‍ ബ്രൗസിങ്ങ് തീര്‍ത്തും നിസ്സാരസംഭവമാണെന്നൊരു 'ഫേസ്ബുക്കര്‍' അഭിപ്രായപ്പെട്ടു. 
ഇന്റര്‍നെറ്റ് വിശാലമായ ലോകമാണ് നമുക്കു മുന്‍പില്‍ തുറന്നു തരുന്നത്. സ്വന്തം കാഴ്ചപ്പാടുകളും ആശയങ്ങളും ഏതു നിമിഷവും പ്രകടിപ്പിക്കാന്‍ ഇ-ലോകം സഹായിക്കുന്നു. അവിടെപ്പോലും ഒരു നേരം കഴിഞ്ഞാല്‍ കടന്നുചെല്ലുന്നത് സ്ത്രീകള്‍ക്ക് അരോചകമായി തോന്നുന്നു.
വിര്‍ച്വല്‍ ലോകമെന്നറിയപ്പെടുന്ന ഇന്റര്‍നെറ്റ് നമുക്കു ചുറ്റും സൃഷ്ടിക്കുന്നതൊരു മായിക വലയമാണ്. അവിടെ ആണ്‍-പെണ്‍ വ്യത്യാസമില്ലാതെയുള്ള സംവാദനശീലമുണ്ടെങ്കിലേ നല്ല കൂട്ടായ്മകളും അഭിപ്രായരൂപീകരണവും സാധ്യമാവുകയുളളൂ.
ബ്ലോഗുകളില്‍ സജീവസാന്നിധ്യമായ ഒരു ചേച്ചി പറയുന്ന പോലെ, 'കഥയും കാലവും മാറി. സ്ത്രീകളുടെ ജീവിതരീതിയും തൊഴില്‍വീഥികളും വ്യത്യസ്തമായി. സമൂഹത്തിന് അതു മനസ്സിലാക്കാന്‍ സാധിച്ചില്ലെങ്കില്‍ അതു ബോധ്യപ്പെടുത്തേണ്ട ചുമതല വനിതകള്‍ക്കാണ്' 
സന്ധ്യ കഴിഞ്ഞാല്‍ പുറത്തിറങ്ങാന്‍ കഴിയാത്ത പല സ്ത്രീകള്‍ക്കും വിലക്കുകളില്ലാത്ത ലോകമാണ് ഓണ്‍ലൈന്‍. അവിടുത്തെ ചതിക്കുഴികള്‍ മനസ്സിലാക്കാനും മറികടക്കാനും കഴിയുമെങ്കില്‍ ഇഷ്ടമുളള നേരത്ത് ബ്രൗസ് ചെയ്യാം, ആരും കടന്നു പിടിക്കുമെന്നു ഭയക്കാതെ!



(മാതൃഭൂമി ഓണ്‍ലൈൻ എഡിഷൻ നിന്ന് പകര്ത്തിയത്..)

നമ്മുടെ കുട്ടികള്‍ വഴി തെറ്റി പോവാതിരിക്കാനായി പാരന്റല്‍ കണ്ട്രോള്‍ സോഫ്റ്റ്‌വെയര്‍

ദിവസവും ഫേസ്ബുക്കിലുടെ പലരും ചോദിക്കുന്ന കാര്യം ആണ് വീട്ടിലെ കുട്ടികള്‍ ഇന്റര്‍ നെറ്റിലുടെ അശ്ലീല സൈറ്റുകളില്‍ എത്താതിരിക്കാന്‍ എന്ത് ചെയ്യാന്‍ പറ്റും എന്ന്. നമ്മള്‍ ഏതൊക്കെ രീതിയില്‍ ബ്ലോക്ക് ചെയ്തു വച്ചാലും അതെല്ലാം പൊളിച്ചടുക്കാന്‍ മിടുക്കര്‍ ആണ് ഇന്നത്തെ പിള്ളേര്‍ നമ്മളെക്കാള്‍ അറിവ് അവര്‍ക്കായിരിക്കും കമ്പ്യൂട്ടറിന്റെ കാര്യത്തില്‍ . കുട്ടികള്‍ വഴി തെറ്റുന്നത് തടയാന്‍ Parental Control Software എന്ന പേരില്‍ നിറയെ സോഫ്റ്റ്‌വെയറുകള്‍ നെറ്റില്‍ കിട്ടാനുണ്ട്. അതില്‍ നല്ലത് എന്ന് തോന്നിയ ചില സോഫ്റ്റ് വെയറുകള്‍ ഇവിടെ പരിചയപ്പെടുത്താം. ചിലതെല്ലാം കാശ് കൊടുത്തു വാങ്ങേണ്ടവയാണ് എന്നിരുന്നാലും നമ്മുടെ കുട്ടികളുടെ കാര്യത്തിനു ആയതു കൊണ്ട് കുറച്ചു കാശ് മുടക്കുന്നത് തന്നെയാ നല്ലത്.

Netdog porn filter

നെറ്റ് ഡോഗ് പോണ്‍ ഫില്‍റ്റെര്‍ ഇത് വളരെ നല്ലൊരു സോഫ്റ്റ്‌വെയര്‍ തന്നെയാണ്. ഇത് ഇന്‍സ്ടാല്‍ ചെയ്യുന്ന സമയത്ത് തന്നെ ഓട്ടോമാറ്റിക് ആയി കുറെ സൈറ്റുകള്‍ ബ്ലോക്ക് ആവും. ഇനി നമുക്ക് ഫേസ് ബുക്ക് അത് പോലെ ഉള്ള വേറെ ഏതെങ്കിലും ബ്ലോക്ക് ചെയ്യണം എന്നുണ്ടെങ്കില്‍ അത് ആഡ് ചെയ്യാനുമുള്ള സൗകര്യം ഇതില്‍ ഉണ്ട്. പാസ്‌വേഡ് ഇട്ടു നമുക്ക് ഇത് പ്രൊട്ടെക്റ്റ് ചെയ്യാം. ഇന്‍സ്റ്റാല്‍ ചെയ്തു കഴിഞ്ഞാല്‍ ആരും അറിയാതെ സൈലന്റ് ആയിട്ട് അത് വര്‍ക്ക്‌ ചെയ്‌തോളും. ഇനി അഥവാ ആരെങ്കിലും കണ്ടു പിടിച്ചു അത് റിമുവ് ചെയ്യുമെന്ന പേടിയും വേണ്ട. പാസ്‌വേഡ് അടിച്ചു കൊടുത്താല്‍ മാത്രമേ ഇത് കമ്പ്യൂട്ടറില്‍ നിന്നും ഒഴിവാക്കാന്‍ കഴിയു. ഇവിടെക്ലിക്ക് ചെയ്തു നെറ്റ് ഡോഗ് പോണ്‍ ഫില്‍റ്റെര്‍ ഡൌണ്‍ലോഡ് ചെയ്യാം.

Net Nanny

40 യു എസ് ഡോളര്‍ വില വരുന്നുണ്ട് ഇതിന്റെ വില. ഇവിടെ ക്ലിക്ക് ചെയ്തു ഡൌണ്‍ ലോഡ് ചെയ്യാം.

k9 web protection

k9 web protection ഇത് ഫ്രീ ആയി തന്നെ ഡൌണ്‍ ലോഡ് ചെയ്യാം. ഫ്രീ ആയി ഡൌണ്‍ ലോഡ് ചെയ്യാന്‍ ഇവിടെ ക്ലിക്ക് ചെയ്‌തോളു.

ഗൂഗിള്‍ വഴിയെല്ലാം സേര്‍ച്ച് ചെയ്യുമ്പോള്‍ കുട്ടികള്‍ അറിയാതെ അനാവശ്യ വെബ് സൈറ്റുകളിലേക്ക് എത്തി പെടാതിരിക്കാനും വളരെ നല്ലതാണ് ഇത്.

ഇത്രയൊക്കെ ആണെങ്കിലും കുട്ടികളുടെ ഉള്ളം കയ്യില്‍ ഒതുങ്ങുന്ന മൊബൈലില്‍ അവര്‍ക്ക്‌ ആവശ്യമുള്ളതെലാം കിട്ടുന്നുണ്ട്. കുട്ടികള്‍ക്ക് മൊബൈല്‍ വാങ്ങിച്ചു കൊടുക്കുമ്പോള്‍ ഈ കാര്യം കൂടെ ശ്രദ്ധിക്കുക. കഴിയുന്നതും കുട്ടികള്‍ക്ക് ഇന്റര്‍ നെറ്റും ക്യാമറയും എല്ലാം ഉള്ള മൊബൈല്‍ വാങ്ങിച്ചു കൊടുക്കാതിരിക്കുക

എപ്പോഴും ആരോഗ്യത്തോടെ

എപ്പോഴും ആരോഗ്യത്തോടെ ഊര്‍ജ്ജസ്വലരായി ഇരിക്കാനാണ് നാമെല്ലാവരും ആഗ്രഹിക്കുന്നത്. നാമെല്ലാം കൃത്യമായി ആഹാരം കഴിക്കാറും മറ്റുമുണ്ട്. എന്നാല്‍ പൂര്‍ണ്ണ ആരോഗ്യവാന്‍മാരാണോ എന്ന് ചോദിച്ചാല്‍ അല്ലതാനും. ഉന്‍മേഷപൂര്‍ണ്ണമായ ജീവിതം നയിക്കുന്നതിന് ഇപ്പോഴത്തെ ജീവിതരീതിയില്‍ കാര്യമായ മാറ്റം വരുത്തേണ്ടതുണ്ട്.

• ആഹാരക്രമം പാലിക്കുക

ആഹാരകാര്യത്തില്‍ കൃത്യമായ ക്രമം പാലിക്കുക. എല്ലാത്തരം ധാന്യങ്ങളും ഫലവര്‍ഗ്ഗങ്ങളും പച്ചക്കറികളും ഭക്ഷണത്തില്‍ ഉള്‍പ്പെടുത്താന്‍ മറക്കരുത്. രുചിയ്ക്ക് പ്രാധാന്യം നല്‍കുന്നതിനൊപ്പംതന്നെ സമീകൃതമായ ആഹാരം കഴിക്കാനും ശ്രദ്ധിക്കുക. ഇവയോടൊപ്പംതന്നെ ആവശ്യത്തിന് വെള്ളം കുടിയ്ക്കാനും ശ്രദ്ധിക്കണം. രാത്രികാലങ്ങലില്‍ ഒരുപാട് വൈകി ഭക്ഷണം കഴിക്കുന്നതും ഒഴിവാക്കണം.

• പോഷകസമൃദ്ധമായ ഭക്ഷണം നിര്‍ബന്ധമാക്കുകത്യമായ ക്രമം പാലിക്കുക.

എല്ലാത്തരം ധാന്യങ്ങളും ഫലവര്‍ഗ്ഗങ്ങളും പച്ചക്കറികളും ഭക്ഷണത്തില്‍ ഉള്‍പ്പെടുത്താന്‍ മറക്കരുത്. രുചിയ്ക്ക് പ്രാധാന്യം നല്‍കുന്നതിനൊപ്പംതന്നെ സമീകൃതമായ ആഹാരം കഴിക്കാനും ശ്രദ്ധിക്കുക. ഇവയോടൊപ്പംതന്നെ ആവശ്യത്തിന് വെള്ളം കുടിയ്ക്കാനും ശ്രദ്ധിക്കണം. രാത്രികാലങ്ങലില്‍ ഒരുപാട് വൈകി ഭക്ഷണം കഴിക്കുന്നതും ഒഴിവാക്കണം.

ഒരോ വ്യക്തികളുടേയും പ്രായവും ശരീരപ്രകൃതിയുമനുസരിച്ച് വ്യത്യസ്തമായ പോഷകങ്ങള്‍ ഭക്ഷണത്തില്‍ ഉള്‍പ്പെടുത്തുക. കുട്ടികള്‍ക്ക് ശാരീരികവും മാനസ്സികവുമായ വളര്‍ച്ചയ്ക്കുതകുന്ന ഭക്ഷണം നല്‍കുക. പ്രായമായവര്‍ക്ക് അവരുടെ ആരോഗ്യം നിലനിര്‍ത്താന്‍ ആവശ്യമായ പോഷകങ്ങളും നല്‍കുക. മാത്രമല്ല ശുദ്ധമായ ഭക്ഷണം നന്നായി ചവച്ചരച്ച് സമയമെടുത്ത് കഴിക്കുക.

• ആരോഗ്യത്തിന് ഹാനികരമായ ശീലങ്ങള്‍ ഒഴിവാക്കുക

പുകവലി, മദ്യപാനം പോലെ ആരോഗ്യത്തിന് ഹാനികരമായ ശീലങ്ങള്‍ ഒഴിവാക്കുക. ഇവയൊക്കെ ഉപയോഗിക്കുന്നവര്‍ക്കുമാത്രമല്ല കുടുംബാംഗങ്ങള്‍ക്കും കൂടി ദോഷം ചെയ്യുന്നു. ഇത്തരം ദുശ്ശീലങ്ങള്‍ ഭാവിയില്‍ വലിയ ആരോഗ്യപ്രശ്നങ്ങളുണ്ടാക്കിയേക്കാം. ക്യാന്‍സര്‍പോലെയുള്ള മാരകരോഗങ്ങള്‍ക്ക് പുകവലിശീലം വഴിവയ്ക്കുന്നു. അതിനാല്‍ ബുദ്ധിപൂര്‍വ്വം ഇത്തരം ശീലങ്ങള്‍ ഒഴിവാക്കുക.

• വ്യായാമം മുടക്കരുത്

കൃത്യമായി ഏതെങ്കിലും വ്യായാമം ചെയ്യുന്നത് ശീലമാക്കുക. ജോഗിംഗ്, നീന്തല്‍ തുടങ്ങിയവയില്‍ ഏതെങ്കിലും ഒന്ന് മുടങ്ങാതെ ചെയ്യുന്നത് കൊളസ്ട്രോള്‍ പോലെയുള്ള രോഗങ്ങള്‍ പിടിപെടാതിരിയ്ക്കാന്‍ ഉപകരിയ്ക്കും. കുടുംബാംഗങ്ങള്‍ക്കൊപ്പം വ്യായാമം ചെയ്യുന്നത് വയത്യസ്തമായ അനുഭവംതന്നെയായിരിക്കും.

• എല്ലാമാസവും ആരോഗ്യപരിശോധന നടത്തുക

ഭക്ഷണകാര്യത്തിലും വ്യായമത്തിലും ശ്രദ്ധിക്കുന്നതിനോടൊപ്പംതന്നെ കൃത്യമായി ആശുപത്രിയില്‍ പോയി ആവശ്യമായ പരിശോധനകള്‍ നടത്തുക. ആവശ്യമെങ്കില്‍ ഡോക്ടറിന്റെ നിര്‍ദ്ദേസശപ്രകാരം മരുന്ന് കഴിക്കുക. കൃത്യമായ ഇടവേളകളില്‍ പരിശോധന നടത്തുകയാണെങ്കില്‍ ഭക്ഷണത്തിലും വ്യായാമത്തിലും വേണ്ട മാറ്റം വരുത്താന്‍ സാധിക്കും.

• വിനോദത്തിനായി സമയം കണ്ടെത്തുക

ജോലിത്തിരക്കിന്റെയും മറ്റും ടെന്‍ഷന്‍ ഒഴിവാക്കാനായി വിനോദത്തിനായി കുറച്ച് സമയം മാറ്റിവയ്ക്കുക. സംഗീതം കേള്‍ക്കുകയോ കുടുംബാംഗങ്ങള്‍ക്കൊപ്പം ചിലവഴിയ്ക്കുകയോ ചെയ്യുക. ആരോഗ്യപൂര്‍ണ്ണമായ ജീവിതം മുന്നോട്ട് നയിക്കുന്നതിന് ഇത്തരം ഉല്ലാസപൂര്‍ണ്ണമായ നിമിഷങ്ങള്‍ സഹായകരമാകും.

കൗശലക്കാരനു പറ്റിയ അമളി

കൗശലക്കാരനു പറ്റിയ അമളിവലിയ കൗശലക്കാരനാണെന്ന് സ്വയം വിശ്വസിച്ചിരുന്ന ഒരാളുടെ കഥയാണിത്. സ്ത്രീകളുടെ എല്ലാ തന്ത്രങ്ങളും തനിക്കറിയാമെന്നും അതിനാല്‍ ഒരു പെണ്ണിനും തന്നെ ചതിക്കാന്‍ കഴിയില്ലെന്നും വീമ്പു പറഞ്ഞു നടന്നിരുന്ന ഒരാളുണ്ടായിരുന്നു.

സുന്ദരിയായ ഒരു സ്ത്രീ അയാളുടെ വീരവാദത്തെക്കുറിച്ച് അറിയാനിടയായി. ഒരു ദിവസം അവള്‍ അയാളെ അത്താഴത്തിനു ക്ഷണിച്ചു. മനോഹരമായലങ്കരിച്ച സല്ക്കാരമുറിയില്‍ വിശേഷപ്പെട്ട പലതരത്തിലുള്ള ഭക്ഷണപാനീയങ്ങള്‍ ഒരുക്കിവെച്ചു. സ്ഥലത്തെ അറിയപ്പെടുന്ന സൗന്ദര്യധാമമായ അവളെ പരിചയപ്പെടാന്‍ കൊതിച്ചുകൊണ്ടിരുന്ന കഥാനായകന്‍ ക്ഷണം സന്തോഷപൂര്‍വം സ്വീകരിച്ചുവെന്ന് പറഞ്ഞാല്‍ മതിയല്ലോ. അവള്‍ ഏറ്റവും വിശേഷപ്പെട്ട വസ്ത്രങ്ങള്‍ ധരിച്ച്, വിലകൂടിയ വാസനത്തൈലം പൂശി, വശ്യമായ പുഞ്ചിരിയോടെ അയാളെ സ്വാഗതം ചെയ്തു. അദ്ഭുതകരമായ അവളുടെ ആകാരഭംഗി ഏതൊരു പുരുഷഹൃദയത്തിലും കോളിളക്കം സൃഷ്ടിക്കാന്‍ പോന്നതായിരുന്നു. ദര്‍ശനമാത്രയില്‍തന്നെ കഥാനായകന്‍ മതിമറന്നു.

എന്നാല്‍ സ്ത്രീയാകട്ടെ, ഏതുനിമിഷവും തന്റെ ഭര്‍ത്താവ് കടന്നുവരുമെന്ന് പ്രതീക്ഷിച്ച് ഭയപ്പെട്ടുകൊണ്ടിരിക്കുകയായിരുന്നു. ആ ചിന്ത അവളുടെ മുഖം മ്ലാനമാക്കിയിരുന്നു. അന്യപുരുഷന്മാരെ വീടിന്റെ പരിസരപ്രദേശത്ത് കണ്ടാല്‍ പോലും അയാള്‍ ചോരചിന്താന്‍ മടിച്ചിരുന്നില്ല. അങ്ങനെയിരിക്കെ വീട്ടിനുള്ളില്‍വെച്ച് ഒരു പുരുഷനെ കണ്ടുമുട്ടിയാല്‍ സ്ഥിതി എന്തായിരിക്കും?
അങ്ങനെ അവളും എന്തുവന്നാലും അവളെ പ്രാപിക്കുമെന്നു വീമ്പുപറയുന്ന നായകനും മദനപരവശരായി സരസസല്ലാപത്തില്‍ മുഴുകിക്കൊണ്ടിരിക്കെ ആരോ വാതിലില്‍ തട്ടുന്ന ശബ്ദം കേട്ടു.

'അയ്യോ, എന്റെ ഭര്‍ത്താവ് എത്തിക്കഴിഞ്ഞു.' സ്ത്രീ ചാടിയെഴുന്നേറ്റു. കാമുകനാകട്ടെ പേടിച്ചുവിറയ്ക്കുകയായിരുന്നു. കൗശലക്കാരിയായ സ്ത്രീ പെട്ടെന്ന് അയാളെ ഒരു വലിയ അലമാറയ്ക്കുള്ളിലാക്കി വാതിലടച്ച് ഉമ്മറവാതില്‍ തുറന്നു.
അയാള്‍ അകത്തു കടന്നപ്പോള്‍ സല്ക്കാരമുറിയില്‍ ഒരുക്കി വെച്ച വിഭവങ്ങള്‍ കണ്ടു. അയാള്‍ അത്ഭുതത്തോടെ ചോദിച്ചു:
'ഇതെല്ലാം എന്താണ്?'
'എന്താണെന്ന് കാണുന്നില്ലേ?'
'ഉണ്ട്. പക്ഷേ, ആര്‍ക്കുവേണ്ടിയാണ് ഇതെല്ലാം ഒരുക്കിയിട്ടുള്ളത്?'
'ഞാന്‍ ഇവിടെ ക്ഷണിച്ചുവരുത്തിയ എന്റെ കാമുകനുവേണ്ടി.'
'എന്നിട്ട്, അവനെവിടെ?'
'ഇതാ ഈ അലമാറയ്ക്കുള്ളില്‍ ഒളിപ്പിച്ച് വെച്ചിട്ടുണ്ട്.'
കുപിതനായ ഭര്‍ത്താവ് അലമാറയുടെ അടുത്തുചെന്നു. അത് പൂട്ടിയിരുന്നു.
'എവിടെ ഇതിന്റെ താക്കോല്‍?'
'ഇതാ.' അവള്‍ താക്കോല്‍ അയാളുടെ നേര്‍ക്ക് എറിഞ്ഞുകൊടുത്തു.
അയാള്‍ താക്കോലെടുത്ത് അലമാറ തുറക്കാന്‍ ഭാവിച്ചപ്പോള്‍ അവള്‍ പൊട്ടിച്ചിരിച്ചു.
'നീയെന്താണ് ചിരിക്കുന്നത്?'
'നിങ്ങളുടെ മണ്ടത്തരവും ആലോചനക്കുറവുമോര്‍ത്തപ്പോള്‍ ചിരിച്ചുപോയതാണേ.' അവള്‍ പറഞ്ഞു:
നിങ്ങള്‍ക്ക് ഇത്ര ബുദ്ധിയില്ലാതായല്ലോ! എനിക്ക് യഥാര്‍ഥത്തില്‍ ഒരു കാമുകനുണ്ടായിരിക്കുകയും ഞാനയാളെ ഈ അലമാറയില്‍ ഒളിപ്പിച്ചു വെക്കുകയും ചെയ്തിരുന്നുവെങ്കില്‍ അയാളതിനകത്തുണ്ടെന്ന് നിങ്ങളോടു പറയുമെന്ന് കരുതുന്നുണ്ടോ? ഒരിക്കലും അങ്ങനെയുണ്ടാവാന്‍ വഴിയില്ല. നിങ്ങള്‍ യാത്ര കഴിഞ്ഞ് മടങ്ങിവരുമ്പോള്‍ ഒരു നല്ല വിരുന്ന് തരാമെന്നേ ഞാന്‍ കരുതിയിരുന്നുള്ളൂ. കൂട്ടത്തില്‍ നേരംപോക്കിനുവേണ്ടി കാമുകന്റെ കാര്യം പറഞ്ഞെന്നുമാത്രം. എനിക്കൊരു കാമുകനുണ്ടായിരുന്നുവെങ്കില്‍ നിങ്ങളെ ഇതുപോലെ വിശ്വസ്തതയോടെ സ്‌നേഹിക്കുമെന്നു കരുതുന്നുണ്ടോ?'

അതുകേട്ട് ഭര്‍ത്താവ് ഒരു നിമിഷം ചിന്തിച്ചു നിന്നശേഷം തീന്‍മേശയുടെ അടുത്തേക്കു വന്നു.
'വാസ്തവം. ഞാന്‍ ഒരു വിഡ്ഢിത്തം കാണിച്ചു.' അയാള്‍ പറഞ്ഞു: 'എനിക്ക് നിന്റെ സ്‌നേഹത്തില്‍ യാതൊരു സംശയവുമില്ല.'
പിന്നീടവര്‍ രണ്ടുപേരും സുഖമായി ഭക്ഷണം കഴിക്കുകയും കുടിക്കുകയും ചെയ്തു.
ഭര്‍ത്താവ് പുറത്തു പോകുന്നതുവരെ സാധു കാമുകന്‍ അലമാറയ്ക്കുള്ളിലിരുന്നു. സ്ത്രീ അലമാറയുടെ വാതില്‍ തുറന്നപ്പോള്‍ അയാള്‍ ക്ഷീണിച്ച് അവശനായിരുന്നു. അയാള്‍ ഒരു വലിയ അപകടത്തില്‍നിന്ന് രക്ഷപ്പെട്ടു.

'നിങ്ങള്‍ സ്ത്രീകളുടെ തന്ത്രങ്ങള്‍ മുഴുവന്‍ പഠിച്ച ആളാണെന്ന് വീമ്പു പറയാറുണ്ടല്ലോ. എന്നാല്‍ എന്റെ തന്ത്രത്തോടു കിടപിടിക്കുന്ന തന്ത്രമുണ്ടോ?'
'ഇല്ല സമ്മതിച്ചു,' കാമുകന്‍ പറഞ്ഞു: 'തന്ത്രത്തില്‍ നിങ്ങളെ ജയിക്കാന്‍ കഴിയില്ല.'
കണ്ടോ പെണ്ണിന്റെ തന്ത്രം.
പെണ്ണൊരുമ്പെട്ടാല്‍, കഴിയാത്തതെന്തുണ്ട് ?

ഫ്രെന്റ്ഷിപ്പിലും മായമോ..??

ഫ്രെന്റ്ഷിപ്പിലും മായമോ..??


ഒരുപാടര്‍ത്ഥ തലങ്ങളുള്ള ബന്ധം.. അതിനെ നമുക്കെങ്ങനെയെല്ലാം നിര്‍വചിക്കാം..??
പരിധികളില്ലാത്ത ഒരു ബന്ധം.. നമുക്കാരേയും ആ ബന്ധത്തിന്റെ പരിധിയില്‍ കൊണ്ടു വരാം..അഛന്‍, അമ്മ, സഹോദരന്‍, സഹോദരി, മുത്തഛന്‍, മുത്തശ്ശി, കൂടെ പഠിക്കുന്നവര്‍, അയല്‍ക്കാര്‍, കൂടെ ജോലി ചെയ്യുന്നവര്‍.. അങ്ങനെ ആരും ആകാം.. എന്തും പറയാനും.. എന്തും പങ്കു വെക്കാനും.. മനസ്സു തുറന്നു സംസാരിക്കാനും.. ഉള്ള ഒരാള്‍.. നമുക്കൊരു നല്ല കാര്യം വരുമ്പോള്‍ നമ്മളെക്കാള്‍ അധികം സന്തോഷിക്കുന്ന ഒരാള്‍.. നമുക്കൊരു പ്രശ്നം വരുമ്പോള്‍ നമ്മുടെ കൂടെ നിന്ന് നമുക്കൊപ്പം ആ പ്രശ്നം നേരിടുന്ന ഒരാള്‍... സ്വന്തം പ്രശ്നമായി ഏറ്റെടുത്ത് കൈകാര്യം ചെയ്യുന്നവര്‍..!!
'FRIEND'
മുകളില്‍ പറഞതെല്ലാം ശെരിയാണെന്നു നിങ്ങള്‍ സമ്മതിച്ചേക്കാം.. എന്നിരുന്നാലും.. എങ്ങനെയാണ് നമ്മള്‍ മറ്റൊരാളെ ഒരു കൂട്ടുകാരന്‍ അല്ലെങ്കില്‍ കൂട്ടുകാരിയായി കാണുന്നത്.?? മാസങ്ങളോളം.. വര്‍ഷങ്ങളോളം കൂടെ നടക്കുന്നു.. ഒരുമിച്ചു എല്ലാ കാര്യങ്ങളും കുരുത്തക്കേടുകളും ചെയ്യുന്നു. എന്നിട്ടോ.. എന്തെങ്കിലും നിസ്സാര കാര്യത്തിന്റെ പേരു പറഞു പരസ്പരം പഴിചാരി തല്ലു കൂടി പോകുന്ന എത്രയോ ആളുകളെ നാം കാണുന്നു.. എത്രയോ കാര്യങ്ങള്‍ നമ്മള്‍ കേള്‍ക്കുന്നു...ഇതിനെ 'FRIENDSHIP' എന്നു വിളീക്കാമോ..??
ഇന്നീ വാക്കു സ്വന്തം വീട്ടുകാരുടെയും നാട്ടുകാരുടെയും കണ്ണില്‍ പൊടിയിടാനുള്ള ഒരു എക്സ്ക്യൂസ് മാത്രമായി മാറിയില്ലെ..?? ആരെങ്കിലും എന്തെങ്കിലും ചോദിച്ചാല്‍ ഇവനെന്റെ/ഇവളെന്റെ ബെസ്റ്റ് ഫ്രെന്റാ എന്നു പറഞു രക്ഷപ്പെടാനുള്ള ഒരുപാധി.. അങ്ങനെ പറഞു രക്ഷപ്പെട്ടിട്ടുള്ള എത്ര ഫ്രണ്ട്ഷിപ്പ് ഇന്നും നിലവിലുണ്ട്..?? നിന്റെ ഫ്രന്റെന്ത്യേ എന്നു ചോദിച്ചാല്‍ എത്ര ഈസിയായിട്ട് പറയുന്നു.. ആ ഞങ്ങളു ബ്രേക് അപ് ആയി എന്നു..! ഇതും ഫ്രെന്റ്ഷിപ്പ്...!! അല്ലെ..??
ഏതൊക്കെ തരത്തിലുള്ള സൗഹൃദങ്ങള്‍ നമ്മള്‍ കാണുന്നു..?? ഓണ്‍ ലൈന്‍ കൂട്ടുകാര്‍.. ചാറ്റ് കൂട്ടുകാര്‍.. ഫോണ്‍ കൂട്ടുകാര്‍..ഇതൊക്കെയല്ലെ ഇന്നത്തെ കൂട്ടുകെട്ട്..?? നമ്മള്‍ അവരെ കൂട്ടുകാര്‍ എന്നു വിളീക്കുന്നു.. എങ്കില്‍ പോലും ഇങ്ങനെ പരിചയപ്പെടുന്ന എത്ര പേരോടു നമ്മള്‍ നമ്മുടെ യഥാര്‍ത്ത കാര്യങ്ങള്‍ വെളിപ്പെടുത്താറുണ്ട്..?? ഇതു വായിക്കുന്നവരില്‍ 80% പേര്‍ക്കെങ്കിലും ഇങ്ങനെ കൂട്ടുകാരെന്നു വിളിക്കാന്‍ അല്ലെങ്കില്‍ വിളിക്കുന്ന ഒരു പാടു പേരുണ്ടാകും.. ഒന്നു ചോദിക്കട്ടെ സഹോദരാ/ദരി...?? നിങ്ങളില്‍ എത്ര പേര്‍ നിങ്ങള്‍ ഓണ്‍ലൈന്‍ ഫ്രണ്ട് എന്നു വിളിക്കുന്നവരോട് സത്യം പറഞിട്ടുണ്ട്..? അവരെ നിങ്ങള്‍ കൂട്ടുകാരെന്നു വിളിക്കുന്നുണ്ടെങ്കില്‍ നിങ്ങളെന്തിനു അവരൊടു സത്യം പറയാന്‍ ഭയക്കണം..? നിങ്ങള്‍ക്കു പേടിയാണെങ്കില്‍.. വിശ്വാസമില്ലെങ്കില്‍ നിങ്ങളെന്തിനു അവരെ കൂട്ടുകാര്‍ എന്നുള്ള ഓമന പേരിട്ടു വിളിച്ച് ആ മഹത്തായ ഫ്രണ്ട്ഷിപ്പ് എന്ന ബന്ധത്തിന്റെ പവിത്രത കളയുന്നു..?? അതിന്റെ വിശ്വാസ്യത തകര്‍ക്കുന്നതെന്തിന്..?? അതിനെ ഫ്രണ്ട്ഷിപ്പ് എന്നു വിളീക്കാമോ..?? ഈ കാര്യങ്ങള്‍ എല്ലാം വെച്ചു നോക്കുമ്പോള്‍ ഓണ്‍ ലൈന്‍ ഫ്രണ്ട്ഷിപ്പ് എന്നുള്ള ഒരു സംഗതി ഉണ്ടോ..??
നമുക്കു എന്തും തുറന്നു പറയാവുന്നവരല്ലെ നമ്മുടെ കൂട്ടുകാര്‍..? നമുക്കു ഇങ്ങോട്ടു കിട്ടണം എന്നു ആഗ്രഹിക്കുന്ന കാര്യങ്ങള്‍ നാം മറ്റുള്ളവര്‍ക്കു ചെയ്തു കൊടുക്കൂ.. മറ്റുള്ളവര്‍ നമ്മളോടു ചെയ്താല്‍ നമുക്കു വിഷമമുണ്ടാകുന്ന കാര്യങ്ങള്‍ നമ്മള്‍ മറ്റുള്ളവരോടു ചെയ്യാതിരിക്കൂ.. നമുക്കെന്തു കൊണ്ട് ആ രീതിയില്‍ കാര്യങ്ങളെ നോക്കി കണ്ടൂ കൂടാ..?? കൂട്ടുകാരെന്നു പറഞു തോളില്‍ കയ്യിട്ടു നടക്കുമ്പോഴും ഞാന്‍ ഇങ്ങനെയാണ് , നമ്മുടെ കൂട്ടുകാരാണ് നമ്മളെ മനസ്സിലാക്കി പെരുമാറേണ്ടത്, അവര്‍ക്കു വേണമെങ്കില്‍ അവരു ചെയ്യട്ടെ എന്നു കരുതി നടക്കുന്നവരെ നമുക്കു യഥാര്‍ത്ത കൂട്ടുകാരെന്നു വിളിക്കാമോ..??
അവന്‍ ചെയ്യട്ടെ.. അവള്‍ ചെയ്യട്ടെ.. അവന്‍ എന്ന മനസ്സിലാക്കട്ടെ.. അല്ലെങ്കില്‍ അവള്‍ എന്നെ മനസ്സിലാക്കട്ടെ എന്നു കരുതി ഇരിക്കുന്ന വാശികള്‍..?? അവന്‍ അല്ലെങ്കില്‍ അവള്‍ എന്നെ മനസ്സിലാക്കട്ടെ എന്നും കരുതിയിരിക്കുന്നവരേ.. ഞാനൊന്നു ചോദിക്കട്ടെ.. നിങ്ങള്‍ ചിന്തിക്കുന്ന പോലെ തന്നെയല്ലെ നിങ്ങളുടെ കൂട്ടുകാരും ചിന്തിക്കുക.. നമ്മളെ മനസ്സിലാക്കട്ടെ... ഇങ്ങോട്ടു വരട്ടെ എന്നു ചിന്തിച്ചിരിക്കുന്നതിനു പകരം നമ്മളെന്തു കൊണ്ട് അവരെ മനസ്സിലാക്കാന്‍ ശ്രമിക്കുന്നില്ല..?? ആ രീതിയില്‍ നമ്മള്‍ ചിന്തിക്കാന്‍ തുടങ്ങിയാല്‍ ഭൂമിയില്‍ ഏതെങ്കിലും ബന്ധം എന്നെങ്കിലും തകരുമോ..??
താല്‍ക്കാലികമായി കൂട്ടുകാരെന്നു പറയുന്നവരെ സന്തോഷിപ്പിക്കാന്‍(അതൊ ഒഴിവാക്കാനോ..??) നമുക്കു ചെയ്യാന്‍ പറ്റാത്ത കാര്യം ചെയ്യാം എന്നു പറയുമ്പോഴും.. പിന്നീടു അതിനു ഒരു പാടു ന്യായീകരണങ്ങള്‍ കണ്ടെത്തുമ്പോഴും നമ്മളെപ്പോഴെങ്കിലും നമ്മുടെ കൂട്ടുകാരുടെ മാനസികാവസ്ഥയെ പറ്റി ചിന്തിക്കാറുണ്ടോ..?? ഞാനിങ്ങനെ പറഞാല്‍ അല്ലെങ്കില്‍ ചെയ്താല്‍ നമ്മുടെ കൂട്ടുകാര്‍ എന്തു കരുതും എന്നു ചിന്തിക്കാറൂണ്ടോ..?? അത് സാരമില്ല.. അവനല്ലെ..?? പറഞാല്‍ മനസ്സിലാകും.. അല്ലെങ്കില്‍ മനസിലാക്കിക്കൊള്ളും.. അല്ലെങ്കില്‍ പോയി പണി നോക്കട്ടെ..കുറച്ചു നാളു മിണ്ടാതിരുന്നു വീണ്ടും തിരിച്ചു വന്നു കൊള്ളും.. വരുമ്പോള്‍ വരട്ടെ എന്നു കരുതിയിരിക്കുന്നവരെ.. ഒരു ചോദ്യം.. നിങ്ങള്‍ നിങ്ങളുടെ കൂട്ടുകാര്‍ക്ക് അത്രയല്ലെ വില കല്പ്പിക്കുന്നൊള്ളു..?? നിങ്ങള്‍ക്കു ചെയ്യാന്‍ കഴിയാത്ത ഒരു കാര്യം എന്തിനു ചെയ്യാം എന്നു പറയുന്നു..?? ഇതു തന്നെ നിങ്ങള്‍ കൂട്ടുകാരെന്നു പറയുന്നവര്‍ നിങ്ങളോടു ചെയ്താല്‍ അതു നിങ്ങള്‍ക്കെത്രമാത്രം വേദനയുളാവാക്കും.. ഒന്നു ചിന്തിച്ചാല്‍ നല്ലത്..!!
നമ്മളില്‍ എത്ര പേര്‍ നമുക്കൊപ്പം കളിച്ചു വളര്‍ന്നു പിന്നീടു ജീവിത യാത്രയില്‍ വേറിട്ടു പോയ നമ്മുടെ കളികൂട്ടുകാരെ ഓര്‍ക്കുന്നുണ്ട്..?? കൊച്ചു കൊച്ചു ഇണക്കങ്ങളും പിണക്കങ്ങളുമായ് ഒരുമിച്ചു വളര്‍ന്നവരെ ഓര്‍ക്കാറുണ്ട്..?? ജീവിതത്തിന്റെ തിരക്കുകള്‍ക്കിടയില്‍ കണ്ടുമുട്ടുന്ന ഒരു പാടു വ്യക്തികള്‍.. കുറെ നാള്‍ ഒരുമിച്ചു ജോലി ചെയ്യുമ്പോള്‍.. അല്ലെങ്കില്‍ ഒരുമിച്ചു താമസിക്കുമ്പോള്‍ നമ്മള്‍ അവരെ കൂട്ടുകാര്‍ എന്നു വിളിക്കുന്നു.. അവസാനം ജോലി മാറി.. അല്ലെങ്കില്‍ താമസം മാറി കഴിയുമ്പോള്‍ കൂടിയാല്‍ കുറച്ചു നാളുകള്‍ ഇ മെയിലും ഫോണ്‍ വിളിയും ആയി കുശലാന്വേഷണങ്ങള്‍.. പിന്നെ പുതിയ ആളുകള്‍.. പുതിയ കൂട്ടുകാര്‍(അങ്ങനെ വിളക്കപ്പെടുന്ന ബന്ധങ്ങള്‍) ഇതൊക്കെയല്ലെ നിത്യ ജീവിതത്തില്‍ സംഭവിക്കുന്നത്.. സംഭവിച്ചു കൊണ്ടിരിക്കുന്നത്..??
മാറുന്ന കാലം.. മാറുന്ന ലോകം.. മാറുന്ന നമ്മള്‍.. ഇതിനിടയില്‍ ബന്ധങ്ങളും അവയുടെ അര്‍ത്ഥവ്യാപ്തിയും കാലത്തിനും, കോലത്തിനും.. ആളുകള്‍ക്കും.. അവസരങ്ങള്‍ക്കുമൊത്തു മാറുന്നു.. അല്ലെങ്കില്‍ എളുപ്പത്തിനു വേണ്ടി പലരും മാറ്റുന്നു.. സ്വന്തം കാര്യം കാണാന്‍ മാത്രം.. അല്ലെങ്കില്‍ കുറച്ചു നാള്‍ എഞ്ചോയ് ചെയ്യാന്‍ വേണ്ടി.. സ്വന്തം സന്തോഷത്തിനായി.. പരസ്പരം മടുക്കുമ്പോള്‍ പിരിഞു പോകാന്‍ മാത്രമുള്ളതായി മാറിയിരിക്കുന്നു ഇന്നു ബന്ധങ്ങള്‍.. നാമെല്ലാം പറയുന്ന മനസ്സെന്ന സാധനം വെറും പറച്ചില്‍ മാത്രമായി മാറിയിരിക്കുന്നു..
കാലം മാറുന്നതനുസരിച്ച് ലോകത്തിന്‍ പലമാറ്റങ്ങളുമുണ്ടാകുന്നു. ചിലമാറ്റങ്ങള്‍ നല്ലതാകുമ്പോള്‍ മറ്റു പലതും തെറ്റായ മാറ്റങ്ങളാകുന്നു...തിന്മയിലേക്കാകുന്നു...ഇന്ന് മനുഷ്യ ബന്ധങ്ങള്‍ക്കും മാനുഷീക മൂല്യങ്ങള്‍ക്കും വില കല്പ്പിക്കാത്ത ലോകം. സ്വാര്‍ത്ഥതാത്പര്യങ്ങള്‍ക്കായി കുട പിടിക്കാന്‍ മാത്രമുള്ളാ ബന്ധങ്ങള്‍.. യഥാര്‍ത്ഥ ബന്ധങ്ങളും, ആത്മാര്‍ത്ഥ സ്നേഹവും ഇല്ലാതാകുന്നു. നമ്മുടെ ഇന്നത്തെ ജീവിത സാഹചര്യങ്ങളും അതിനൊരു കാരണമാണ് എന്നുള്ളാത വിസ്മരിക്കാന്‍ പറ്റില്ല. വയസ്സായ മാതാപിതാക്കളെ പരിചരിക്കാതെ [പരിചരിക്കാനാകാതെ] അന്യനാട്ടില്‍ കഴിയേണ്ടിവരുന്ന മക്കള്‍. തിരിച്ചുമാവാം...കുട്ടികളുടെ പല കാര്യങ്ങളും ശ്രദ്ധിക്കാനൊക്കാത്ത മാതാപിതാക്കള്‍...ഇവിടെ പലപ്പോഴും സാഹചര്യങ്ങളാണ് വില്ലനാകുന്നത്. ആഗ്രഹമില്ലാതല്ല, മറിച്ച് നിവൃത്തികേടുകൊണ്ടായിരിക്കാം പല സന്ദര്‍ഭങ്ങളിലും. അതുപോലെ തന്നെ friendship ലും.
ഇന്ന് എല്ലാത്തിലും മായം കലര്‍ന്നിരിക്കുന്നു. സൌഹൃദങ്ങളിലും. ആളുകള്‍ പരസ്പരം കാണുന്നതും മനസ്സുതുറന്ന് സംസാരിക്കുന്നതും കുറഞ്ഞു. അതുമൂലം സ്നേഹബന്ധങ്ങളിലെ വ്യാപ്തി കുറഞ്ഞു. മനുഷ്യര്‍ കൂടുതല്‍ സ്വാര്‍ത്ഥരായി. സൌഹൃദം വെറും Hi യിലൊതുങ്ങുന്നു. ആത്മാര്‍ത്ഥ സൌഹൃദങ്ങള്‍ അന്യം നിന്നുപോകുന്നു...സൌഹൃദം എന്ന വാക്ക് അര്‍ത്ഥശൂന്യമാകുന്നു...ആത്മാര്‍ത്ഥതയും...!

എങ്ങനെ ലാപ്‌ടോപ് ബാറ്ററിയുടെ ആയുസ്സ് കൂട്ടാം?

ഡെസ്‌ക്ടോപ് കമ്പ്യൂട്ടറിനേക്കാളും ഇപ്പോള്‍ മിക്കവരുടേയും കയ്യിലുണ്ടാകുക ലാപ്‌ടോപ് ആണ്. ലാപ്‌ടോപ് നിത്യേന ഉപയോഗിക്കുന്നവരും ആഴ്ചയിലൊരിക്കലും മറ്റും ഉപയോഗിക്കുന്നവരും നമ്മുടെ കൂട്ടത്തില്‍ കാണും. ഡെസ്‌ക്ടോപിനേക്കാളും വളരെ ശ്രദ്ധയോടെ കൈകാര്യം ചെയ്യേണ്ട കമ്പ്യൂട്ടിംഗ് ഉപകരണമാണ് ലാപ്‌ടോപ്. പൊടികളും മറ്റും കയറാതെ വൃത്തിയായി സൂക്ഷിക്കുക എന്നതിലുപരി ഇതിലെ ഘടകങ്ങളുടെ പരിചരണം കൂടിയുണ്ടായാലേ ലാപ്‌ടോപിന് അയുസ്സ് കൂടുകയുള്ളൂ.

ലാപ്‌ടോപിലെ ഒരു സുപ്രധാന ഘടകമാണ് അതിലെ ബാറ്ററി. പലപ്പോഴും ലാപ്‌ടോപ് വാങ്ങി അധികം കഴിയും മുമ്പേ ബാറ്ററി കേടുവരുന്ന സ്ഥിതി ഉണ്ടാകാറുണ്ട്. അതിന്റെ ഉപയോഗത്തില്‍ നമ്മള്‍ ശ്രദ്ധക്കുറവ് കാണിക്കുന്നു എന്നതാണ് ഇതിന് പ്രധാന കാരണം. ബാറ്ററിയുടെ ആയുസ്സ് കൂട്ടാന്‍ സഹായിക്കുന്ന ചില ലളിതമാര്‍ഗ്ഗങ്ങള്‍ ഇതാ:

·         നെറ്റ്‌വര്‍ക്കോ, ഇന്റര്‍നെറ്റോ ഉപയോഗിക്കാത്ത സമയങ്ങളില്‍ ലാപ്‌ടോപില്‍ വയര്‍ലസ് കാര്‍ഡുകളോ കണക്റ്ററുകളോ ആവശ്യമില്ല. അവ സ്വിച്ച് ഓഫ് ചെയ്യുക.

·         ശബ്ദം ആവശ്യമില്ലാത്ത സമയത്ത് വോള്യം ലെവല്‍ മ്യൂട്ട് ഓപ്ഷനില്‍ ഇടുക

·         ഡിസ്‌പ്ലെയുടെ ബ്രൈറ്റ്‌നസ് എപ്പോഴും കുറച്ച് വെച്ച് ഉപയോഗിക്കുക. ഇത് കണ്ണിനും നല്ലതാണ്.

·         ബ്ലൂടൂത്ത് ഓപ്ഷന്‍ ഡിസേബിള്‍ ചെയ്യുക.

·         മള്‍ട്ടി ടാസ്‌കിംഗ് കഴിവതും പിന്തുടരരുത്. പിസിയുടെ ആയാസം കൂടുന്നതാണ് ബാറ്ററി വേഗം തീരുന്നതിന് കാരണം. ഒരു ജോലിക്കിടയില്‍ ആവശ്യമില്ലാത്ത മറ്റ് വിന്‍ഡോകളും ആപ്ലിക്കേഷനുകളും തുറന്നിടുന്നത് മൂലം സിസ്റ്റത്തിന് കൂടുതല്‍ ആയാസത്തോടെ പ്രവര്‍ത്തിക്കേണ്ട അവസ്ഥ ഉണ്ടാകുന്നു. ധാരാളം മെമ്മറിയുള്ള ലാപ്‌ടോപ് ആണെങ്കില്‍ ഒന്നിലേറെ ആപ്ലിക്കേഷനുകള്‍ തുറന്നുവെക്കുന്നത് വലിയ പ്രശ്‌നം സൃഷ്ടിക്കില്ല.

·         ഹാര്‍ഡ് ഡ്രൈവ് മെമ്മറിയേക്കാള്‍ വെര്‍ച്വല്‍ മെമ്മറി പരമാവധി ഉപയോഗപ്പെടുത്തുക

·         റാം അഥവാ റാന്റം ആക്‌സസ് മെമ്മറി അധികം ഉപയോഗിക്കാത്ത ആപ്ലിക്കേഷനുകള്‍ പ്രവര്‍ത്തിപ്പിക്കാന്‍ പരമാവധി ശ്രമിക്കണം. ഒരു കത്ത് ടൈപ്പ് ചെയ്യുകയാണ് ആവശ്യമെങ്കില്‍ പ്രോസസിംഗ് ഏറെയുള്ളതും റാം ഏറെ ഉപയോഗിക്കുന്നതുമായ മൈക്രോസോഫ്റ്റ് വേര്‍ഡിന് പകരം ഒരു സാധാരണ ടെക്സ്റ്റ് എഡിറ്റിംഗ് ആപ്ലിക്കേഷന്‍ ഉപയോഗിക്കുക.

·         ഗെയിമുകള്‍, സിനിമകള്‍ എന്നിവ സ്ഥിരമായി കാണുന്നതും ലാപ്‌ടോപ് ബാറ്ററിയ്ക്ക് നല്ലതല്ല. കാരണം ഗ്രാഫിക്‌സ് ഏറെ ഉപയോഗിക്കുന്നവയാണിവ.

·         അമിത താപം അപകടം. അധികം ചൂടുള്ള പ്രദേശങ്ങളില്‍ വെച്ച് ചാര്‍ജ്ജിംഗ് ചെയ്യരുത്. കഴിയുന്നതും മുറികള്‍ക്കുള്ളില്‍ വെച്ച് ചാര്‍ജ്ജിംഗ് നടത്തുക.

·         ബാറ്ററി മികച്ച രീതിയില്‍ ഉപയോഗിക്കാന്‍ സിസ്റ്റത്തിലെ പവര്‍ മാനേജ്‌മെന്റ് സെറ്റിംഗ്‌സ് സഹായിക്കും. എനര്‍ജി സേവര്‍ എന്നും ഇതിനെ വിളിക്കാറുണ്ട്.

·         കുറച്ച് നേരത്തേക്ക് സിസ്റ്റം ഉപയോഗിക്കാന്‍ പദ്ധതിയില്ലെങ്കില്‍ ഷട്ട്ഡൗണ്‍, ഹൈബര്‍നേറ്റ് എന്നിവയേതെങ്കിലും തെരഞ്ഞെടുക്കുക. സ്റ്റാന്‍ഡ്‌ബൈ ഓപ്ഷനിലും ബാറ്ററി ചാര്‍ജ്ജ് കുറഞ്ഞുവരാറുണ്ട്.

·         ബാറ്ററി ഇടയ്ക്കിടെ വൃത്തിയാക്കുക. പൊടികളും അഴുക്കുകളും കളയുക.

·         സിഡി, ഡിവിഡി എന്നിവയുടെ ഉപയോഗം കുറക്കുക. ഓപ്റ്റിക്കല്‍ ഡ്രൈവുകള്‍ ധാരാളം ബാറ്ററി ഊര്‍ജ്ജം ഉപയോഗിക്കും.

·         എംഎസ് വേര്‍ഡ്, എക്‌സല്‍ എന്നിവയുടെ ഓട്ടോസേവ് സൗകര്യം ടേണ്‍ ഓഫ് ചെയ്തിടുക. ഇടയ്ക്കിടെ സേവ് ചെയ്യുന്നത് ഹാര്‍ഡ് ഡ്രൈവിന്റെ ജോലിഭാരം ഉയര്‍ത്തും.

·         പോര്‍ട്ടുകള്‍ ടേണ്‍ ഓഫ് ചെയ്തിടുക. യുഎസ്ബി, എതര്‍നെറ്റ്, വിജിഎ, വയര്‍ലസ് പോര്‍ട്ടുകള്‍ ആവശ്യമില്ലാത്തപ്പോള്‍ ഡിസേബിള്‍ ചെയ്തു വെക്കുക. ഡിവൈസ് മാനേജര്‍ ഉപയോഗിച്ച് ഇത് ചെയ്യാവുന്നതാണ്.

·         ഊര്‍ജ്ജ സംരക്ഷണ ഹാര്‍ഡ്‌വെയര്‍ പ്രൊഫൈലുകള്‍ തയ്യാറാക്കുക. ഏതെല്ലാം സാഹചര്യങ്ങളിലാണ് നിങ്ങള്‍ ലാപ്‌ടോപ് ഉപയോഗിക്കാറുള്ളതെങ്കില്‍ അതിനനുസരിച്ച്, ഔട്ട്‌ഡോര്‍, കോഫിഷോപ്പ്, ഓഫീസ് എന്നിങ്ങനെ പ്രൊഫൈലുകള്‍ തയ്യാറാക്കാം. സ്റ്റാര്‍ട്ട് ബട്ടണില്‍ നിന്ന് കണ്‍ട്രോള്‍ പാനല്‍ തെരഞ്ഞെടുത്ത് അതില്‍ പെര്‍ഫോമന്‍സ് ആന്റ് മെയിനന്റനന്‍സ് ക്ലിക് ചെയ്ത് സിസ്റ്റം ഓപ്ഷന്‍ ക്ലിക് ചെയ്തുള്ള രീതിയിലാണ് വിന്‍ഡോസ് എക്‌സ്പിയില്‍ ഹാര്‍ഡ്‌വെയര്‍ പ്രൊഫൈല്‍ തയ്യാറാക്കുക. വിന്‍ഡോസ് എക്‌സിപിയില്‍ മാത്രമേ മൈക്രോസോഫ്റ്റ് ഈ സൗകര്യം നല്‍കുന്നുള്ളൂ.

·         ലാപ്‌ടോപ് എളുപ്പം ചൂടാകുന്ന പ്രതലത്തില്‍ വെക്കാതിരിക്കുക. തലയണ, പുതപ്പ് തുടങ്ങിയ മൃദുലമായ വസ്തുക്കള്‍ ചൂട് ഉയര്‍ത്തും.

·         ഒഎല്‍ഇഡി ഡിസ്‌പ്ലെകള്‍ ഉള്ള ലാപ്‌ടോപുകള്‍ വെള്ള നിറമുള്ള ചിത്രങ്ങള്‍ക്ക് കൂടുതല്‍ ഊര്‍ജ്ജം നഷ്ടപ്പെടുത്തുന്നതാണ്. കറുപ്പ് ചിത്രങ്ങള്‍ക്ക് കുറഞ്ഞ ഊര്‍ജ്ജമേ ആവശ്യമുള്ളൂ.

·         ഉപയോഗിക്കാത്ത നേരത്തും ഇന്റര്‍നെറ്റ് ബ്രൗസര്‍ ഓപണ്‍ ചെയ്ത് വെക്കരുത്. കാരണം ബാക്ക്ഗ്രൗണ്ടില്‍ ഓരോ സെക്കന്റിലും ഇത് അപ്‌ഡേറ്റ് ആകുന്നുണ്ട്.

·         പെന്‍ഡ്രൈവ്, ഡിവിഡി പോലുള്ള എക്‌സ്‌റ്റേണല്‍ ഡിവൈസുകള്‍ ഉപയോഗിക്കാത്ത സമയത്ത് ഇജക്റ്റ് ചെയ്‌തെടുക്കുക.

മൊബൈൽ ഫോൺ വെള്ളത്തിൽ വീണാൽ....

മൊബൈൽ ഫോൺ ഉപയോഗിക്കുന്ന എല്ലാവരുടെയും പേടിസ്വപ്നമാണ് വെള്ളം. ചിലപ്പോൾ മഴയത്തോ, ചിലപ്പോൾ വസ്ത്രം അലക്കുമ്പോഴോ, ചിലപ്പോൾ കുട്ടികൾ എടുത്ത് കളിച്ചോ, ചിലപ്പോൾ കുനിയുമ്പോൾ പോക്കറ്റിൽ നിന്നോ, ചിലപ്പോൾ നമ്മുടെ അശ്രദ്ധകൊണ്ടോ ഒക്കെ ഒരിക്കലെങ്കിലും മൊബൈൽ ഫോൺ വെള്ളത്തിൽ വീഴാത്ത ഒരാളും ഇവിടെ കാണില്ല. എന്നാൽ വെള്ളത്തേക്കാൾ നമ്മുടെ അശ്രദ്ധയും, ഒരു പരിധി വരെ അജ്ഞതയുമാണ് വെള്ളത്തിൽ വീണ മൊബൈൽ ഫോൺ തകരാറിലാകുന്നതിന് പ്രധാന കാരണം. അല്പം പ്രഥമശുശ്രൂഷ അറിയുമെങ്കിൽ തീർച്ചയായും നിങ്ങൾക്ക് വെള്ളത്തിൽ വീണ മൊബൈൽ ഫോണിന്റെ ജീവൻ രക്ഷിക്കാൻ സാധിക്കും.

ആദ്യമായി പറയട്ടെ, വെള്ളത്തിൽ വീണാൽ അലിഞ്ഞു പോകുന്നതോ, ദ്രവിക്കുന്നതോ ആയ ഒരു ഭാഗവും ഫോണിൽ ഇല്ല. മറിച്ച് വളരെ വിവിധ ഇലക്ട്രോണിക്സ് ഘടകങ്ങളുടെ അടുത്തടുത്തായി സ്ഥിതിചെയ്യുന്ന കാലുകൾക്കിടയിൽ വെള്ളം നിന്ന് വൈദ്യുതി കടന്ന് പോകുമ്പോൾ ഷോർട്ട്സർക്യൂട്ട് ആകുന്നതാണ് കൂടുതലായും മൊബൈൽ ഫോണിനെ തകരാറിലാക്കുന്നത്. എന്നാൽ വെള്ളം കടന്നു ചെന്നാൽ ഡിസ്പ്ലേയിൽ മങ്ങൾ ബാധിക്കുവാൻ സാധ്യത ഉണ്ടെന്നുള്ളത് സത്യമാണ്. അതായത് നനവ് പൂർണ്ണമായി ഒഴിവാക്കാൻ സാധിക്കുമെങ്കിൽ നിങ്ങളൂടെ ഫോണിന് മിക്കവാറും സന്ദർഭങ്ങളിൽ ഒരു തകരാറും സംഭവിക്കില്ല. ഇതിനായി എന്തെല്ലാം കാര്യങ്ങൾ ചെയ്യണമെന്ന് നമുക്ക് നോക്കാം. ഇത് മൊബൈൽ ഫോണിൽ മാത്രമല്ല, ക്യാമറ, mp3 പ്ലേയർ, ടാബ്ലെറ്റ് എന്നിവയുടെ എല്ലാം കാര്യത്തിൽ ഉപയോഗിക്കാവുന്നതാണ്.

1.       വെള്ളത്തിൽ വീണ ഫോൺ ഓഫ് ചെയ്യുകയും ബാറ്ററി നീക്കുകയും ചെയ്യുക എന്നുള്ളതാണ് പ്രഥമ ശുശ്രൂഷയുടെ ആദ്യ ഘട്ടം. കാരണം ഫോൺ ഓഫ് ആണെങ്കിൽ പോലും ബാറ്ററി ഉണ്ടെങ്കിൽ പല ഭാഗത്തും വൈദ്യുതിപ്രവാഹം ഉണ്ടാകാൻ സാധ്യതയുണ്ട്. ഇത് ഷോർട്ട് സർക്യൂട്ടിന് കാരണമായേക്കാം. ഇത് എല്ലാവരും ചെയ്യുമെങ്കിലും, അല്പസമയം കഴിയുമ്പോഴേക്കും നമ്മുടെ ഫോണിന് എന്തെങ്കിലും സംഭവിച്ചോ എന്നറിയാനുള്ള ജിജ്ഞാസ കാരണം നമ്മൾ ഒന്ന് പരിശോധിക്കാൻ ശ്രമിക്കും. 3 ദിവസത്തേക്ക് ഈ ആകാംക്ഷ മറികടക്കാൻ കഴിയുമെങ്കിൽ നിങ്ങൾ ആദ്യ ഘട്ടം വിജയകരമായി പൂർത്തിയാക്കി എന്നു കരുതാം.

2.        അടുത്തതായി ഫോണിന്റെ നിങ്ങൾക്ക് ഊരിയെടുക്കാൻ കഴിയുന്ന എല്ലാ ഭാഗങ്ങളും സിം കാർഡും, മെമ്മറി കാർഡും മറ്റ് ബോഡി ഭാഗങ്ങളും ഊരി സൂക്ഷിച്ച് വയ്ക്കുക. ഇനി ഫോൺ കേടായാൽ തന്നെയും സിം കാർഡിലെയും, മെമ്മറി കാർഡിലെയും വിവരങ്ങൾ എങ്കിലും സംരക്ഷിക്കാൻ ഇത് സഹായിക്കും.

3.        അടുത്ത ഘട്ടം തീർത്തും നിങ്ങളുടെ ഫോണിന്റെ അവസ്ഥയെ അനുസരിച്ചാണ്. നിങ്ങളുടെ ഫോൺ ഉപ്പുവെള്ളത്തിലോ, ചെളിവെള്ളത്തിലോ, സാമ്പാറിലോ, പായസത്തിലോ ഇനി മറ്റ് എന്തെങ്കിലും തരത്തിൽ രാസവസ്തുക്കളുടെ സാന്നിദ്ധ്യമുള്ള ലായനികളിലോ ആണ് വീണതെങ്കിൽ നല്ലപോലെ വെള്ളം ഉപയോഗിച്ച് കഴുകുക. ഇത്തരം രാസപദാർഥങ്ങളുടെ സാന്നിധ്യം പൂർണ്ണമായും ഇല്ലാതാക്കാൻ ശ്രദ്ധിക്കണം, ഫോണിന്റെ പുറത്തുനിന്നല്ല, അകത്തുനിന്നും ഇവ നീക്ക് ചെയ്യണം. കാരണം ഇവയുടെ സാന്നിധ്യം ഫോണിലെ ലോഹഭാഗങ്ങൾ പെട്ടെന്ന് ദ്രവിക്കുന്നതിനും, അതുവഴി ഇപ്പോൾ തകരാർ ഒന്നും സംഭവിച്ചില്ലെങ്കിലും വളരെ പെട്ടെന്ന് ഇത് തീർത്തും ഉപയോഗശൂന്യമാകുന്നതിനും കാരണമാകും.

4.        അടുത്തതായി ഫോണിന്റെ ഉള്ളിൽ കടന്ന വെള്ളത്തിനെ പെട്ടെന്ന് നീരാവീകരിച്ച് പുറത്തു കളയുക എന്നുള്ളതാണ്.അതിനായി വേണെമെങ്കിൽ അല്പം ആൽക്കഹോൾ(മദ്യം), ബോഡി സ്പ്രേ എന്നിവ ഉള്ളിലേക്ക് ഒഴിക്കാവുന്നതാണ്. ഇത് വെള്ളം പെട്ടെന്ന് ബാഷ്പീകരിക്കുന്നതിന് സഹായിക്കും. എന്നാൽ വളരെ കുറച്ച് വെള്ളമേ നനഞ്ഞിട്ടുള്ളു എങ്കിൽ ഇതിന്റെ ആവശ്യമില്ല.

5.        അടുത്തതായി ഫോൺ വെയിലത്ത് വയ്ക്കാവുന്നതാണ്. എന്നാൽ ഇത് യുക്തിസഹമായി ചെയ്യേണ്ടതാണ്. അമിതമായ വെയിൽ ഏൽക്കുന്നത് ഡിസ്പ്ലേ തകരാറിലാകുന്നതിന് കാരണമായേക്കാം. അതിനാൽ ഒരു തുണി വിരിച്ച് അതിൽ ഡിസ്പ്ലേയിൽ നേരിട്ട് വെയിലടിക്കാത്ത രീതിയിൽ വയ്ക്കാൻ ശ്രദ്ധിക്കുക.

6.     

6.        വെയിൽ ഇല്ലാത്ത സമയമാണെങ്കിൽ ശക്തിയായ വായു പ്രവാഹിപ്പിക്കുന്നത് വഴിയും ഉള്ളിലെ വെള്ളം ബാഷ്പീകരിക്കുന്നത് ത്വരിതപ്പെടുത്താവുന്നതാണ്. ഇതിൻ ഫാനിന്റേയോ, വാക്വം ക്ലീനറിന്റെയോ, എയർ കമ്പ്രസ്സറിന്റേയോ സഹായം തേടാവുന്നതാണ്. എന്നാൽ ഹീറ്റർ(ഹെയർ ഡ്രൈയർ) ഉപയോഗിക്കുന്നത് ഫോൺ അമിതമായി ചൂടാകുന്നതിന് കാരണമാകും. ഓർക്കുക ഒന്നോ രണ്ടോ മിനിറ്റ് വായു പ്രവാഹം ഉണ്ടായി എന്നു കരുതി ഒരിക്കലും അതിലെ ജലാംശം പൂർണ്ണമായും പോകില്ല എന്ന് തിരിച്ചറിയുക. വെള്ളം അതേരൂപത്തിൽ അല്ലാതെ പൊടിപടലങ്ങൾ നനഞ്ഞ് ഇരുന്നാലും ഷോർട്ട് സർക്യൂട്ട് ഉണ്ടാകാവുന്നതാണ്.

7.        അടുത്തതായി ഫോൺ ഉണങ്ങിയ അരിയോ, സിലിക്ക പാക്കറ്റുകളോ ഉള്ള പാത്രത്തിൽ ഒരു ദിവസത്തേക്ക് അടച്ച് വയ്ക്കുക. ഇവ രണ്ടിനും ജലാംശം വലിച്ചെടുക്കാൻ നല്ല കഴിവുണ്ട്. അതുപോലെ തന്നെ അരി എടുക്കുമ്പോൾ ഒരു തുണികൊണ്ട് തുടച്ച് അതിലെ പൊടി നീക്കം ചെയ്യുന്നത് വളരെ നന്നായിരിക്കും.

8.        ഇത്രയും കഴിഞ്ഞാൽ നമ്മുടെ ഫോണിന്റെ അവസ്ഥ നമുക്ക് പരിശോധിക്കാവുന്നതാണ്. സിം, മെമ്മറി കാർഡ് എന്നിവ ഇടാതെ ബാറ്ററി ഇട്ട് ശ്രദ്ധയോടെ ഫോൺ ഓൺ ചെയ്യുക. ഫോൺ അമിതമായി ചൂടാവുകയോ, LED, ഡിസ്പ്ലേ എന്നിവയുടെ പ്രകാശത്തിൽ എന്തെങ്കിലും വ്യതിയാനമോ ഉണ്ടെങ്കിൽ ഉടനെ തന്നെ ഓഫ് ചെയ്യുകയും, വീണ്ടും ഉണക്കുകയും ചെയ്യുക.

പുതുതലമുറ ഫോണുകൾ മിക്കവാറും വെള്ളം നനഞ്ഞാൽ നിറം മാറുന്നതരം വാട്ടർ സ്റ്റിക്കറുമായാണ് വരുന്നത്. അതിനാൽ നിങ്ങളുടെ ഫോൺ വെള്ളത്തിൽ വീഴുന്ന സമയത്തു തന്നെ അതിന്റെ വാറണ്ടി മിക്കവാറും നഷ്ടപെട്ടു കാണും. അതിനാൽ നിങ്ങൾക്ക് എറ്റവും സുരക്ഷിതമായ മാർഗ്ഗം ഈ പറഞ്ഞ പ്രഥമശുശ്രൂഷകൾ നൽകുക എന്നുള്ളതാണ്. അതുപോലെ തന്നെ ഈ പറഞ്ഞ എല്ലാം ചെയ്ത് നിങ്ങളുടെ ഫോണിന്റെ യഥാർത്ഥ അവസ്ത അറിഞ്ഞതിനു ശേഷം മാത്രം ആവശ്യമെങ്കിൽ സർവീസിനു നൽകുക. വെള്ളം വീണു എന്നു പറഞ്ഞു വരുന്ന ഫോൺ ഉടമകളോട് ഒരു കുഴപ്പവും ഇല്ലാത്ത ഭാഗങ്ങൾ കേടായെന്നും അതു മാറ്റിവച്ചെന്നും പറഞ്ഞ് അനാവശ്യമായി പണമീടാക്കുന്ന ദുഷ് പ്രവണത ഒരു ചെറിയ ശതമാനം സർവീസ് സെന്ററുകളിലെങ്കിലും കണ്ടുവരുന്നുണ്ട്